網紅的藏寶箱搞完市集同班手足執晒啲嘢送返公司，本應食飯慰勞下，但係爭咗一個人，加上又想將啲市集優惠擺上網店，仲想出多一輯patreon，就冇食飯留咗喺公司， 11點返到黃埔，本來想喺樓下買碗燉湯，原來間點心蒸飯已經冇燉湯賣，其實我心裏面想飲酸辣湯，但啲上海舖又收晒，結果由仁孚行到家維邨，買咗個碗仔翅頂住酸辣湯條引，另加個漢堡包仔。
尋晚搞完市集，數錢嗰陣好開心，雖然唔係好多，不過數自己賺返嚟嘅錢係有滿足感嘅(你懂的)，數完入銀行嗰剎那就醒起月頭要俾家用老婆。
今日完咗數錢，數完又醒起要俾錢阿媽，搞咗兩日市集，自己可以落袋嘅，大概就係枱上面呢餐宵夜時間食嘅晚餐，以及參展商同各位入場朋友嘅人情。